العياري: “صاك نجلاء ب 8 ملاين وأزمة خبز في الأفق”
قال النائب عن حزب أمل وعمل، ياسين العياري في تدوينة على صفحته الرسمية على الفايسبوك إن هناك أزمة خبز في الأفق، حيث يكفي مخزون القمح اللين فقط لنهاية نوفمبر، وفق قوله.
وهذا نص التدوينة كاملا:
“أزمة خبز في الأفق.
مخزون القمح اللين، يكفي فقط لنهاية نوفمبر.
القمح اللين الي نعملوا بيه الخبز.
القمح اللين الي نعملوا بيه الخبز.
ديوان الحبوب فالس، رغم ذلك، لأسباب مجهولة، في عوض يشري قمح لين، شرى بطو قمح صلب.
فلس ديوان الحبوب، يخليه حتى بالكريدي ما ينجمش يشري.
يبدو أننا، بفضل السياسة الحكيمة، متع 75 يوم بلاش حكومة، حتى الخبز، بش نشوفو الدول الصديقة و الشفيقة..
الأزمة بين الجزائر و المغرب تحتد
وصلت اليوم إلى حد منع المغرب من الغاز الجزائري.
قريبا يجب على تونس أن تختار.
كان وقفت مع الجزائر، الإمارات و السعودية موش بش تعاونا ماديا
كان وقفت في صف التطبيع، تتوتر جدا علاقتنا مع الجزائر و تزيد عزلتنا عزلة.
سيارات فارهة و الشعب يتضور جوعا!
هكة قال الرئيس، فذبلت الأعين من الحكمة!
موش مشكل كان السيارات الفارهة شارينها بفلوسهم و ما يدبر فيهم حد.
حكاية بفلوسهم، تجي كان في صاك نجلاء!
صاك ب8 ملاين و الشعب يتظور جوعا!
فقط حكاية الصاك كشفت نفاقكم وقت إنقلب السحر على الساحر.
ريتو كيفاش الشعبوية ما أخيبها؟ كيفاش تهدم في أسس العيش المشترك؟ تو ريتوها في صاك نجلاء؟ إمالة علاش تصفقولها؟
لكن اللحاسة، تطربهم شعبويات السلطة فقط.
الشعبوية حق مكتسب للسلطان.
امالة إي نعم، نعاود نأكد و نمضي و نبصم، صاك ب 8 ملاين لرئيسة حكومة التقشف، إسمه قلة حياء.
صاك ب8 ملاين، و من ماركة مستوردة ماهيش إنتاج محلي، يتسمى إعطاء مثل سيء : تقشفوا إنتوما و ما تشريوش الكماليات المستوردة، هذاكا حق كان لحكومة سيدنا الي يدعو للتقشف.
و إستنكار ذلك، له معنى، على عكس حديث الرئيس على سيارات فارهة و الشعب يتظور جوعا! هاذوكم شراوها بفلوسهم و ما دعاوش للتقشف و ماهمش مطالبين بش يعطيو المثل.
حقة، الي قادر يشري صاك ب8 ملاين، أكيد عنده كرهبة فارهة، ب 300 مليون و الشعب يتظور جوعا.
تمنيت الخطة الإقتصادية الي بعثناها للرئيس تاخو نفس الإهتمام.
المرة الجاية، حكايات هكة، نبداهم بصاك نجلاء و الشعب يتضور جوعا.
صاك نجلاء ب8 ملاين و ما عندكمش مخزون قمح و أزمة إقليمية يلزمكم تختاروا فيها صفكم في الأفق و السبراد متاعكم الي على حسابه تتحسب فوائض قروضكم وصل 1400 حاجة من وراء العقل، معناها السوق العالمية ما عندهاش ثقة في بلادكم و الشعب يتضور جوعا.”